Muqdisho oo Maanta ka Bedelan Sidii hore iyo Shirkii Odayaasha Dhaqanka oo Furmaaya

May 5, 2012 by Baraaweland Press Muqdisho:-

Magaalada Muqdisho maanta waxaa ka jirta xaalad ka duwan tii horay loogu yaqaanay waxaana waddooyinka magaalada lasoo dhoobay Ciidamo kala duwan kuwaasi oo sugaaya amniga xilli uu furmaayo shirka Odayaasha dhaqanka.

Xarunta gaadiidka Booliska ee degmada C/casiis maanta waxaa ka furmaaya shirkii ay Odayaasha dhaqanku kusoo xuli lahaayeen Ergada ka qayb gelaysa shirweynaha lagu soo xulaayo Xildhibaanada Baarlamaanka ee cusub ee dalka.

Waxaa siweyn loo adkeeyey amniga xarunta gaadiidka oo shirku ka furmaayo, waxaana iminka kusoo qul qulaaya ergadii soo xuli lahayd Xildhibaanada Baarlamaanka ee cusub.

Shirkaan ayaa waxaa ka qayb gelaaya 135- Oday dhaqameed waxaana uu soconaaya inta ka horaysa 15-ka bishaan markaasi oo si rasmi ah loo ansixin doono dastuurka cusub ee dalku yeelanaayo.

Wasiiru Dowlaha Wasaarada Dastuurka iyo Arrimaha Federaalka Xasan Maxamed Jimcaale ayaa sheegay in maanta si rasmi ah shirkaasi u furmaayo

Marka laga soo tago soo xulista xubnaha Baarlamaanka cusub ayaa sidoo kale odayaasha dhaqanku waxay akhriyi doonaan kana doodi doonaan dhamaan qodobada dastuurka cusub, waxaana lagu wadaa in kuwa muranka dhaliyey wax laga bedelo.

Waxaa siweyn loo adkeeyey amniga waxaana guud ahaanba la xadiday dhaq dhaqaaqa gaadiidka iyo dadka ee degmada C/casiis.

Ciidamo Dawladda katirsan oo isugu jira Nabadsugid, Boolis, Meleteri, Ciidamada kuwa sida gaarka ah u tababaran ee Alfa Group iyo qaybaha kala duwan ee Ciidamada sirdoonka ayaa lagu soo daadiyey inta badan ee degmada C/casiis.

HALKAAN KA AQRISO NUXURKA KHUDBADIHII AY MADAXDA QARANKA IYO HOGAANKA DHAQANKU KA JEEDIYEEN FURITAANKA SHIRKA MADAX DHAQAMEEDYADA SOOMALIYEED MAANTA U FURMAY

Maanta oo ah maalinnimo Sabti ah taariikhda Hijriyada Islaamkuna ay tahay 14-Jumadul-Aakhir-1433 Miilaadiyaduna ay ku beegantahay 05-May-2012 waa maalin ku weyn shacabka Soomaaliyeed guud ahaanba waayo waxaa si rasmi ah uga furmay Caasimadda Dalka Soomaaliya ee Muqdishu Shirka Odayaasha Dhaqanka oo iyagu isaga kala yimid guud ahaanba gobollada Dalka iyo dibadaba kuwaasi oo soo xulaya ergada ansixin doonta Dastuurka Dalka islamarkaana soo xuli doona Baarlamaanka Cusub ayadoo shirka uu si rasmi ah u furmay kadib Salaadii duhur ee xiliga Muqdisho.

Bilowgii Shirka ayaa waxaa goobta lagusoo bandhigay Suugaan kala duwan oo ay soo bandhigeen fanaaniinta kooxda Heegan ee Ciidammada Booliiska Soomaaliyeed ayadoo suugaantaasi ay isugu jirtay Heeso,gabayo iyo Buraanbur kuwaasi oo ay si aad ah uga maqsuudeen dhammaanba xubnihii hoolka ku sugnaa.

Wasiirka Wasaaradda Warfaafinta,Boostada iyo Isgaarsiinta Xukuumadda Soomaaliya Mudane C/qaadir Xuseen Maxamed Jahweyn oo ugu horeyn Khudbad dheer ka jeediyey furitaanka Shirka ayaa mahad celin ballaaran u jeediyey Odayaasha dhaqanka sida ay uga soo qeybgaleen shirkan islamarkaana ay u taaganyihiin maslaxada iyo danaha Umadda Soomaaliyeed.

Wasiir Jahweyn ayaa guul ku tilmaamay in maanta magaalada Muqdisho lagu qabto shirkan Muhiimad ballaaran u leh aayaha Shacbiga Soomaaliyeed waxaana uu kula dardaarmay dhaqanku iney kasoo dhalaalaan Mas’uuliyadooda ayna u horseedaan dadkooda iney ka gudbaan KMG oo dalku uu yeesho Dowlad rasmi ah.

Wasiirka Dastuurka,Dib u heshiisiinta iyo Arrimaha Federaalka Mudane C/laahi Xoosh Jibriil oo khudbad ka jeediyey kulanka ayaa ku dheeraaday marxalidihii kala duwanaa ee uusoo maray Dastuurkan cusub iyo halgankii loosoo galay in odayaasha Soomaaliyeed ay talada gacantooda kusoo laabato islamarkaana shirarkii dibadda lagu qabanjirey loosoo weeciyo gudaha dalka laguna qabtay magaalooyinka Muqdisho iyo Garoowe taasina ay guul tahay.

Wasiirku wuxuu ku dheeraaday qaar ka mid ah qodobada Dastuurka cusub ku qoran oo ay dad dano gaar ah leh umadda si qaldan ugu tarjumeen waxaana uu Wasiirku faahfaahin ka bixiyey qodobada dadka sida qaldan loogu turjumay ama laga been sheegay qodobadaasi oo kala ah qodobada ka hadlaya In Dastuurkan uu aas aas u yahay ku dhaqanka Shareecada Islaamka,Jinsiyadda iyo xuquuqda Sinnaanta waxaana uu xusay in qodobadaasi sida loo turjumay xaqiiqda ay ka fogtahay.

Wasiirku wuxuu la dardaarmay Odayaasha dhaqanka oo uu tilmaamay iney saarantahay Mas’uuliyad weyn maadaama aayaha dalka uu gacantooda ku jiro isaga oo tusaaale usoo qaatay in marxalada uu maanta dalku marayo ay la mid tahay kana adagtahay marxaladihii lasoo maray 1960kii waayo xiligan waxaa dalka la doonayaa inuu ka gudbo gumeysi Qabqable,Gumeysi Shabaab iyo gumeysi fikir.

Suldaan Xasan Xaaji Maxamed Guulwade oo ay Umadda Soomaaliyeed si aad ah u wada yaqaanaan islamarkaana ah abwaanka sameeyey heesta (Samadiidoow  Dabinbaa kuu dhigan Laguugu Dili Doonaa) ayaa Madasha ka jeediyey khudbad waxaana uu muujiyey sida ay lagama maarmaan u tahay Midnimada Umadda Soomaaliyeed isaga oo Shirkana kusoo bandhigay Hees Cusub oo uu ku muujinayo Midnimada Umadda iney muqadas tahay oo la doonayo in laga gudbo kala ququbnaanta iyo kala go’go’a .

“Dastuurku waa Danteenna,Dasuurku Waa Midnimadeenna,Dastuurku waa wadajirkeenna iyo Isku duubni wadajir ah dalka iyo dadkuu u horseedayaa Dastuurku” ayuu Suldaan Xasan Xaaji Maxamed Guulwade kusoo gebagebeeyey hadalkiisa iyadoo ereyadaasina ay la jiiwinayeen Fanaaniinta iyo Qeybaha kala duwan ee ku sugnaa Hoolka Shirarka ee dugsiga General Kaahiye.

Ugaaas C/laahi Ugaas Faarax oo isaguna kamid ah Ugaasyada Beelaha Soomaaliyeed oo Khudbad ka jeediyey Munaasabadda Furitaanka Shirka ayaa ugu horeyn faah faahin ka bixiyey Muhiimadda uu Shacbiga Soomaaliyeed u leeyahay waxaana uu xusay in Shirkan uu guud ahaanba Umadda ka dhaxeeyo waxaanha uu nasiib daro ku tilmaamay in qaar ka mid ah Soomaalida ay u taaganyihiin weli iney dhibaatada dadka kusii haayaan ayagoo danahooda fiirinaya waxaanna uu ka codsaday dadkaasi iney Alle u laabtaan.

Ugaas C/laahi Ugaas Faarax waxa uu ka hadlay Dastuurkan cusub ee ku xeran aayaha Umadda isagoo xusay in la doonayo Shacabka iney ogaadaan in dadka goobta ku sugan ay yihiin Hormuudkii Bulshada wax wax u dhimayana Shacabka Soomaaliyeed,sharafkooda iyo Midnimadoodana aysan usoo qaadeyn ama ansixineyn balse Shacabka dhankooda laga doonayo ineysan u dheg raaricin dadka jahwareerinaya ayagoo danahooda gaarka ah fiirsanaya waxaanna uu Alle ka baryey in Dastuurkaan uu ka dhigo mid umadda u horseedo Wanaag,horumar iyo Barwaaqo.

Suldaan Siciid Suldaan C/salaan Cali Shire oo ka mid ah Salaadiinta beelaha Soomaaliyeed oo isaguna Munaasabadda Khudbad ka jeediyey ayaa ugu horeyn maanta ku tilmaamay iney tahay maalin aad muhiim ugu ah shacbiga,madasha la fadhiyana ay tahay goob aayihii dalka looga arinsanayo waxaana uu Shacbiga Soomaaliyeed ku booriyey iney Dowladooda garab istaagaan isagoo dhanka kalena xusay in Dastuurkaan uu yahay mid waafaqsan Shareecada Islaamka sidaasi darteedna uu Alle ka rajeynayo inuu ku guuleeyo ansixintiisa islamarkaana uu Umadda quluubtooda iskusoo dummo.

Suldaan Warsame Ibraahim Caliyoow Ibroow oo isaguna ka mid ah Salaadiinta Soomaaliyeed oo Khudbad ka jeediyey Madasha ayaa ugu horeyn tilmaamay in maanta ay nasiib weyn tahay in Hogaankii dhaqanka Umadda oo isku duuban ay Muqdisho uga tashadaan aayaha dalka islamarkaana ku ansixiyaan Dastuurka waxaana uu fariin u diray dhinacyada Siyaasadda oo uu weydiiyey iney mudantahay inuu isweydiiyo qof walba oo siyaasi ah waxa uu u qabtay Shacabkiisa iyo dalkiisa mudadii 10ka sano ka badan ee uu hortaagnaa,madaxda Dowladuna waxa uu ku booriyey inay Cadaallad dadkooda ku hogaamiyaan isagoo ugu dambeynna Dhaqanka ugu baaqay iney ka fikiraan oo ay xaqiijiyaan qofka ay usoo xulayaan xubinnimada Baarlamaanka waxaana uu sidoo kale fariin u diray Qurbojoogta oo uu ugu baaqay iney dalkooda kusoo laabtaan oo ay ka qeybqaataan dib u dhiska iyo horumarka Dalkooda.

Suldaan Axmed Jaamac oo isna Salaadiinta Beelaha Soomaaliyeed ka tirsan ayaa Khudbad kooban oo uu xafladii furitaanka ka jeediyey ayuu ugu horeyn Alle ka baryey inuu Umadda Soomaaliyeed dhibaatada ay mudada 20ka sano ka badan kusoo dhexjiraan waxaana uu dhaqanka ku booriyey iney gartaan Mas’uuliyadooda hadii aysan dhaqanku si Alle ka cabsi ah u gudanna waajibkooda ay Umadda dhibaato u horseedi doonaan,si gaar ahna wuxuu Suldaan Axmed Jaamac ugu dardaarmay in Qabiilka la is aaso oo Qarannimada la wada adkeeyo maadaama uu maanta halkaa ina dhigay.

Suldaan Ibraahim Suldaan Cali oo isaguna ka mid ah Salaadiinta Beelaha Soomaaliyeed oo khudbad ka jeediyey dhankiisa Munaasabadda furitaanka Shirka Dhaqanka Soomaaliyeed waxaana uu xusay in Laba qodob ay muhiim tahay fulintooda si looga gudbo KMG kuwaasi oo kala ah in Dastuurka wixii qaldan eek u jira la saxo iyo odayaasha looga baahanyahay waxay gaaraan iney fuliyaan.

Imaam Maxamed Yuusuf oo isaguna Khudbad ka jeediyey Munaasabadda Furitaanka ayaa ugu horeyn Odayaasha Dhaqanka kusoo dhaweeyey Muqdisho oo ay hada Masiirka Umadda u fadhiyaan dareen ahaanna uu ka duwan yahay shirkan shirar dhowr ah oo uu dalka dibadiisa uga qeybgalay waxaana uu Alle ka baryey inuu dhaqanka howshooda ku guuleeyo ayna ballan qaadayaan wixii fiican iney Umadda usoo qaadayaan wixii xunna ay ka celinayaan.

Maryan Mahad Xuseen oo iyaduna ku hadashay magaca ururrada Bulshada rayidka khudbad koobanna ka jeedisay Munaasabadda Furitaanka Shirka ayaa tilmaantay in Haweenka Soomaaliyeed iyo guud ahaanba Bulshada rayidka ay u taaganyihiin ka qeybgalka horumarka Dalka islamarkaana ay guul tahay in maanta Caasimadda Muqdisho Dastuurka dalka lagu ansixiyo waxaana ay ugu dambeyntii ku guubaabisay dhaqanka iney ka hortagaan wixii khilaaf keeni kara cid walbana xuquuqdeeda cadaallad lagusiiyo cidna aan lagu xadgudbin.

Wasiirka Arrimaha Gudaha iyo Amniga Qaranka Mudane C/samad Macalin Maxamuud oo Khudbad ka jeediyey Munaasabadda ayaa ugu horeyn tilmaamay iney farxad u tahay inuu maanta soo hor istaago guud ahaanba Umadda Soomaaliyeed oo maanta dalka gudihiisa isugu yimaada hadana ka tashanaya aayahooda tanina ay tahay mid aanay dalka ka dhicin mudadii uu burburku dalka ka jiray waxaana uu Shacabka reer Muqdisho ku guubaabiyey sida ay usoo dhaweeyeen martida aayaha dalkooda ka tashaneysa.

“Waxey meelkasta uga yimaadeen hogaanka Umadda iney aayaha dalkooda ka tashadaan iyo sidii dalkooda KMG ay ugasaari lahaayeen una horseedi lahaayeen Dowlad guud,in odayaasha Dhaqanka talada iyo aayaha dalka in gacantooda lagusoo celiyana ay tahay guul aad u weyn”ayuu yiri Wasiirka Arrimaha Gudaha iyo Amniga Qaranka.

Wasiirka ayaa xusay in Soomaalidu mudooyinkaan ay ku caanbaxday in waxwalbo oo umadda loo qabanayo hadii qofka uu tiisa ka waayo inuu yiraahdo looma dhammo kaasina uu yahay mid la mid ah kuwa qoriga sita ee aanay Shacbiga Soomaaliyeed la dooneyn iney nabad helaan taasina maanta ay Umaddu garaneyso aayahooda,dantooda iyo horumarka Dalkooda ku jiro waxaana uu ugu dambeyn guud ahaan Umadda ku guubaabiyey iney u wada istaagaan Sugidda Ammaanka Dalka.

Xildhibaanad Khadiijo Maxamed Diiriye oo ku hadashay magaca Xildhibaannada Baarlamaanka Soomaaliyeed ayaa ugu horeyn shirkan ku tilmaantay fursad in mudo ah ay raadinayeen Shacbiga Soomaaliyeed maadaama waqti badan la baadigoobayey in dalka uu ka gudbo KMG taasina maanta ay nasiib u yeelatay Dowladda haatan jirta ee uu Madaxweynaha u yahay Mudane Shariif Sheekh Axmed islamarkaana uu Ra’isulwasaare ka yahay Mudane C/weli Maxamed Cali Gaas waxaana ay uga mahad celisay Dhaqanka Soomaaliyeed sida ay isugu yimaadeen iney hogaanka u qabtaan aayaha Dalkooda oo ay soo xulaan ergadii ansixinlaheyd Dastuurka cusub islamarkaana soo xulaan Baarlamaanka Cusub ee uu dalku yeelanayo waxaana hadalkeeda ay kusoo gebagebeysay fariin Suugaaneed ay cinwaan uga dhigtay”SOOMAALAAY ISDABA QABO OO DASTUUR QAADO”.

Wasiirka Wasaaradda Caafimaadka iyo Daryeelka Bulshada Xukuumadda Soomaaliya Dr C/casiis Sheekh Yuusuf oo isaguna Khudbad ka jeediyey Munaasabadda Furitaanka shirka ayaa ugu horeyn tilmaamay in maanta ay xagiisa ku tahay maalin farxadeed intii uu usoo joogay shirar Soomaaliya loo qabto Shirkan oo kale uusan arag waxaana uu xusay in taasi ay ku timid dadaalka Madaxda Qaranka oo uu ugu horeeyo Madaxweyne Shariif Sheekh Axmed,hogaamiye Dhaqameedyadana iney isasaaraan Xil gooni ah.

Ra’isulwasaare Kuxigeenka ahna Wasiirka Wasaaradda Beeraha,Xanaanada Xoolaha,Dhirta iyo Daaqa oo isagu Khudbad kooban ka jeediyey Munaasabadda Furitaanka Shirka Odayaasha Dhaqanka ayaa ku tilmaamay in maanta ay tahay maalin taariikhi ah Shacbiga Muqdishana ay nasiib u yeesheen iney martigeliyaan Shirka aayaha dalkooda looga arinsanayo.

Ra’isulwasaaraha Xukuumadda Federaalka Soomaaliya Mudane C/weli Maxamed Cali Gaas oo isaguna Khudbad kooban ka jeediyey Xafladda furitaanka Shirka ayaa ugu horeyn xusay in maanta ay tahay maalin taariikhi ah oo bilow u ah isbedel ballaaran oo dalka ka hanaqaada,Dhaqankii Soomaaliyeedna ay ku dhanyihiin Caasimadda loogana fadhiyo iney si hufan uga fikiraan aayaha dalkooda.

“Waxaan maanta joognaa marxalad cusub oo aayaha dalkeenna aan si nabad ah Muqdisho uga hadleyno,Sptember 06 ayey aheyd markii madaxda Soomaalidu ay saxiixeen in aayaha dalka loo furo dhabo cusub waana farxad weyn in aan maanta Muqdisho isugu nimid sidii uu dalku u yeelan lahaa Dowlad Cusub”ayuu yiri Ra’isulwasaare C/weli Maxamed Cali Gaas.

Ra’isulwasaaraha ayaa tilmaamay dhanka kale in Soomaaliya aysan mudo 21sano ah laheyn wax dowlad ah balse 12kii sano ee lasoo dhaafay dalka ay ka jireen Dowladdo KMG ah oo aanay iyagu aduunka xitaa heshiis la geli Karin balse Xukuumaddu ay ka dhabeysay qodobadii la saxiixay 06September taasi oo maanta loo fadhiyo dhabihii looga gudbayey Marxalada kala guurka.

Sidoo kale Ra’isulwasaare C/weli Maxamed Cali waxa uu si kooban u sharaxay 8dii bilood ee lasoo dhaafay waxyaabaha ay xoogga saartay Xukuumadda haatan jirta waxaana uu xusay in waxbadan oo ay Ammaanka ugu horeyso wax laga qabtay iyo dhameystirka Dastuurkan cusub oo Diinta Islaamka ay saldhig u tahay,Diin aanan aheyn Islaamna dalka ka jiri Karin hadana weli Umaddu u furantahay inay qabyo qoraalka Dastuurkan wax ka bedeli karaan.

Ra’isulwasaaraha waxa uu dhanka kale ku dheeraaday marxalada maanta la joogo iney muujineyso sidii dalka uu ku yeeshay Dastuurkii 1960kii kaasi oo ay markiisii hore ansixiyeen Ergey kooban Sanad kadibna Shacabka afti looga qaaday,maantana ay ansixindoonaan marka hore Ergey gaareysa 825 oo qeybaha bulshada la tashiyo la sameynaya kadibna marki cadawga dalka laga xoreeyo afti shacabka looga qaadayo.

Ra’isulwasaare C/weli Maxamed Cali waxa uu mahad ballaaran u celiyey Geesiyaasha Ciidammada Qalabka Sida ee Soomaaliya oo iyagu u istaagay iney dalka Cadawga ka xoreeyaan islamarkaana ay iyagu sabab u yihiin guusha maanta la taaganyahay waxaana uu ugu dambeyntii Ra’isulwasaaruhu la dardaarmay Odayaasha Dhaqanka oo uu kula dardaarmay iney si gaar ah uga fikiraan Cida ay usoo xulayaan Masiirka Umadda Soomaaliyeed.

Gudoomiyaha Baarlamaanka Soomaaliya Mudane Shariif Xasan Sheekh Aadan oo isaguna khudbad ka jeediyey Xaflada Furitaanka Shirka Odayaasha Dhaqanka ayaa ugu horeyn Dhaqanka Soomaaliyeed kusoo dhaweeyey Muqdisho iyo Shirkan qiimaha leh waxaana uu Alle uga mahad celiyey Fursadan uu maanta Umadda Soomaaliyeed gacantooda kusoo celiyey aadna uu ugu faraxsanyahay islamarkaana uu rajeynayo in Odayaasha Dhaqanku ay soo saaraan Dowlad Cusub oo dalka Hanata,waxbadanna u qabata Dadka.

Mudane Shariif Xasan Sheekh Aadan ayaa dhanka kale u mahad celiyey Ciidammada Qalabka Sida ee Soomaaliya iyo kuwa Afrika ee taageeraya waxaana uu xusay in Dastuur la’aan ay tahay Dowlad La’aan,Dowlad La’aanna ay tahay nin in nin walba oo xoogiisa socdo taasina dhibaatadeeda lasoo arkay.

Ugu dambeyntii waxa uu Gudoomiyaha Baarlamaanka ugu baaqay qeybaha Bulshada iney taageeraan Dastuurkaan iyo hanaanka hada socda lagamamaarmaanna ay tahay in lagu wada qanco danta Guud,loona tanaasulo.

Madaxweynaha Jamhuuriyadda Soomaaliya Mudane Shariif Sheekh Axmed oo ugu dambeyntii Khudbad ka jeediyey Xaflada ayaa ugu horeyn hadalkiisa ku bilaabay inuu jecelyahay inuu odayaasha dhaqanka kusoo dhaweeyo Caasimadda waxaana uu yiri”kusoo dhowaada magaaladiinii”.

“Maanta waa maalin taariikhi ah oo ay Umadda Soomaaliyeed u diyaar garoobeyso iney ka gadubto marxalad kala guur ama KMG ayna u gudbaan marxalad Caadi ah taasina waa wax ay xaq u leeyihiin”ayuu Yiri Madaxweyne Shariif Sheekh Axmed.

Madaxweyne Shariif Sheekh Axmed ayaa dhanka kale si kooban uga sheekeeyey dhibaatada ay leedahay KMG sidaasi darteedna ay lagama maarmaan tahay in si dhibaatadaasi looga gudbo isna laga gudbo KMGnimada shirkanna uu bilowyahay sidii marxaladaasi looga gudbi lahaa.

Madaxweynaha ayaa tilmaamay in odayaasha Dhaqanka ee ku kulansan Muqdisho ay yihiin Dhaqankii saxda ahaa islamarkaana aysan shaki ku jirin in Umadda Soomaaliyeed ay ku qanacsanyihiin waxa ay soo xulaan iyo waxa ay ansixiyaanba waxaana uu xusay inuu rajeynayo iney ku guuleysan doonaan howshooda.

Mar uu Madaxweynuhu ka hadlay Dastuurka ayuu yiri” majirto umad noolaan karta Dastuur La’aan lagasoo bilaabo markii aynu xurnimada qaadanay ilaa hadana aan raadineyno,qabyo qoraalka Dastuurkana sida Ra’isulwasaaruhu sheegay hada ayaa nalasoo gaarsiiyey sidaasi darteed waxaan gaarsiin doonnaa guud ahaanba Shacabka dhinac walbo”

Madaxweyne Shariif Sheekh Axmed ayaa dhanka kale xusay in Marxaladda la marayo maanta ay tahay marxalad wanaagsan oo aynu u taagannahay Dowladnimo iyo Waxdhisid,Dowladnimaduna ay tahay waxa qof walba uu ku helayo Xaqiisa si siman oo Cadaallad ah.

Madaxweynaha ayaa sidoo kale xusay in Dastuurkan uu aaminsanyahay inuu waxbadan oo wanaag iyo horumar ah dalka iyo dadka u horseedi doono waxaana uu u mahad celiyey dhammaanba xubnihii ku howlanaa qabyo qoraalka Dastuurka.

Mar uu Madaxweyne Shariif Sheekh Axmed soo hadal qaaday hirgelinta Road-mapka ayaa ayaa sheegay in hirgelintiisu ay meel wanaagsan mareyso maadaama maanta shirka furmay lagusoo xuli doono ergada ansixindoonta Dastuurka kadibna Baarlamaan cusub ay soo xulaan sidoo kalena ay Dowladdu ku guuleysatay Dhismaha Ciidammada Qalabka Sida ee Soomaaliya.

Madaxweyne Shariif Sheekh Axmed ayaa soo hadal qaaday in Siyaasadda hada socota hanaankeeda uusan cidna ka xirneyn oo qof walba oo Soomaali ah ay u furantahay xaqna uu u leeyahay balse dadka qaarkood sida ay wax ku raadinayaan aysan habooneyn islamarkaana aysan aheyn wax wanaagsan in ayadoo dan siyaasadeed la fiirsanayo dadka fowdo iyo burbur loo horseedo taasina natiijada ay leedahay ay Umadda ka dheregsantahay maanta.

Ugu dambeyntii waxa uu Madaxweyne Shariif Sheekh Axmed ka hadlay barnaamijyada horumarinta ah ee dalka lagu hormarinayo ee ay Dowladdu wado waxaana uu xusay in Dowladdu hada ay ka go’antahay dhameystirka horumarinta dalka oo ay ugu horeyso KMGnimada oo dalka laga saaro islamarkaana maanta ay Shacabka Soomaaliyeed iftiinkeedii haayaan maadaama ay jiraan horumarro laga gaaray dhinacyada Ammaanka,Siyaasadda, arrimaha Bulshada iyo dhinacyo kale badan horumarradaasina ay horseedeen in dalka lagu qabto shirkan maanta,dowladihii horey dalalkooda ugu martigelin jireyna Shirarka Soomaaliya quseeyana ay maanta mudan yihiin Mahad celin.

Baraaweland Press waxey idiin soo gudbindoontaa liiska magacyadda madax dhaqameedyada sida rasmiga ah loo aqoonsadaey ee ka qeyb galay shirkii maanta uga furmay Xarunta gaadiidka Booliska ee degmada C/casiis

Goor walba iyo meel walba wararka kala soco Baraaweland Press

wariye Maxamed Maliice

Muqdishu

baraawelandpress@hotmail.com